Made in Spain
10/03/2010 a les 11:42:28 - Archivao en: ActualidáComo supongo que tol mundu sabe, estos díes d’atrás tuvi na Gala d’Entrega de los Premios de la Música y fíxilo en calidá de premiáu. La sensación cola que volví de Madrid foi agridulce, y ello poles razones que voi intentar desplicar depués. Pero enantes quería facer unes consideraciones sobre premios y demás cuestiones. El casu ye qu’estos gallardones qu’entrega l’Academia de les Artes y les Ciencies de la Música (que non la SGAE) son lo que son y hai que velos más como un espectáculu que como otra cosa. Nun foi Dixebra mui de premios. Siempre pensemos que’l meyor y mayor reconocimientu que podíemos tener yera l’apoyu de la xente, yera l’atención hacia les nuestres composiciones, porque ello diba permitinos, como asina foi, perdurar nel tiempu. Lo d’esti Premiu a la Meyor Canción n’Asturianu víemoslo más como una oportunidá de dar a conocer la nuestra realidá llingüística al restu del Estáu que como cualquier otra cosa.
Lleguemos a la capital del reinu ensin saber mui bien a qué nos díbemos enfrentar. Nel mesmu hall del hotel onde tábemos agospedaos cásique tolos protagonistes de la gala, sentímonos como bichos raros ente tanto glamour, ente tantu look y ente tantes popstars. Yá nel teatru, nel fotocall (posáu pa los fotógrafos) la sensación volvió a ser la mesma. Figurábamelos pensando «¿y estos quién c… son?». Ellí, y como por un imán invisible, fuimos xuntándonos el vascu Ruper Ordorika, los gallegos Bau y Luar na Lubre y nós mesmos, como buscando abellugu nun mediu desconocíu. Foi bien prestoso conocer a Ordorika, un pioneru del rock n’eusquera que tantes veces sentí de bien mozu, y que nos recibió con un saludu n’asturianu, «Ye un verdaderu placer», dixo, pa depués contanos que pasara munches vacaciones en Ribesella. Tamién prestó volver a ver a los amigos Xulio y Bieito de Luar na Lubre, colos que cuantayá nun coincidía, y entamar rellación con Bau, el cantautor emerxente na música gallega.
Yá nel patiu de butaques, nel trescursu de la gala, díbemos decatándonos de que lo nuestro yera más bien cosa de lo políticamente correcto más que de l’asunción sincera de la realidá plurillingüística del Estáu. Con detalles, al mio parecer, tan poco casuales como principiar el bloque llamáu Made in Spain entregando’l premiu a la meyor canción n’eusquera. ¿Tan difícil yera tener un aquel pa colos representantes musicales de les otres llingües del Estáu introduciéndonos nel escenariu con un testu pequeñu en caúna d’elles? Quiciabes asina s’evitaríen los marmullos y les muestres sonores de desaprobación cuando Ordorika se dirixó na so llingua a l’audiencia.
Asuntu aparte foi la nuestra intervención, qu’asumimos dafechu y que volveríemos a facer nos mesmos términos. La posibilidá de poder llegar a la cantidá de xente que diba ver per televisión l’actu y la so factible repercusión ye incuestionable. Nun aprovechar esto sería de fatos. Lo de facer la intervención n’asturianu meditémoslo fondamente y lleguemos a la conclusión de qu’asina díbemos mostrar de toes toes que vamos (los defensores del nuestru idioma) en serio, que lo nuestro (la reivindicación llingüística) nun ye un xuegu, y que l’asturianu nun ye un acentu marcáu o una manera rara o antigua de falar castellanu (como munchos de los ellí presentes, toi seguru, creíen). Si a ello añadimos el tiempu tasáu pa falar y la posibilidá real de pasar desapercibíos, nun nos quedaba otro que buscar un efectu mediáticu como fuere. Creemos que la nuestra intervención foi correcta, educada y respetuosa, ensin faltar a naide, pero cola fuercia y la convicción moral del que fala sabiendo que nesi momentu representa a tou un movimientu cívicu en pro de los derechos llingüísticos d’una parte importante de la población asturiano, con serios problemes de visibilización dientro y fuera d’Asturies. Polo tanto, creemos que la esternalización del conflictu llingüisticu asturianu ye imprescindible pa igualu. ¿Con qué nos atopamos? Colos comentarios inoportunos y desafortunaos de la presentadora y, lo más grave, la reacción del públicu asistente a la gala, que demostró una sensibilidá nula pa cola realidá multillingüística del Estáu, mostrando les zunes más gafes del etnocentrismu español, pal que’l simple fechu de sentir falar a un conciudadanu n’otra llingua que nun sía’l castellanu produz-y un sarapicu. La sensación que me produció esta esperiencia ye que tovía queda munchu tiempu, muncha pedagoxía, muncha educación y munchu respetu pa que s’almita ensin torgues y democráticamente que nesti Estáu una parte considerable de la ciudadanía tien derechu a espresase na llingua na que más a gustu se sienta (como comentemos na nuestra intervención).
Otra manera, ye encomiable la rectificación de Diana Navarro y les sos disculpes públiques y personales polos sos comentarios, cosa que-y agradecemos y de la que podríen garrar exemplu munchos representantes políticos asturianos qu’echen la llingua a pacer ensin ponese coloraos. Ellos xustamente tienen la responsabilidá de que los asturianofalantes nos sintamos respaldaos y protexíos.
Fuimos a Madrid con un oxetivu: el de facer ver interior y esteriormente que’l movimientu de reivindicación llinguística asturianu sigue vivu y tien enfotu abondo pa siguir na llucha. Volvimos cola sensación agridulce de la que falaba nel empiezu, pero cola conciencia tranquila porque fiximos lo qu’había que facer.
Comentarios fechos (3)
cova pría Fecha: 11/03/2010 a les 16:22:47
Gracies. Emocionome oívos. Ye mucha la xente que vos apoya. Y ye mucho lo que queda por facer. Los que hablamos un asturianu perroneru, porque nos reñíen en la escuela, y pa encima el pá y la má eren caún d'una punta Asturies, queremos que los nuestros fíos puean espresase como quieran y sepan que l'arbol sin raigañu nun tien futuru.
Iván Fecha: 11/03/2010 a les 16:17:26
Gracies Xune, gracies Dixebra
Jesusito Fecha: 10/03/2010 a les 17:51:03
Yo tovía diría más: dixistis lo qu'habia que dicir. Gracies.
