Derechos d'autor y ética
24/02/2010 a les 18:02:53 - Archivao en: ActualidáSoi de la opinión de que caún o caúna tien d’arrecostinar coles sos contradicciones como meyor pueda. Tol mundu tenemos y nun nos queda otro que convivir con elles. Personalmente son abondes les que llevo dientro de la mio cabeza y intento nun volveme llocu. D’ente toes hai una que nos últimos tiempos vien esmoliéndome más de la cuenta y que cada vez llevo peor. Concretamente digo esto porque nun toi n’absoluto d’alcuerdu cola política vorazmente recaudadora de la SGAE, pero al mesmu tiempu creo que ye necesaria una entidá que salvaguarde los derechos de los creadores. Éstos nun dexen de ser asimilables perfectamente al gremiu de los trabayadores, que tienen organizaciones llamaes sindicatos que velen pol cumplimientu de los sos derechos y lluchen pol llogru d’otros nuevos. ¿Por qué non los creadores musicales? El mundu del trabayu vien tresformándose radicalmente (nel sen etimolóxicu del términu, ‘de raíz’) dende mediaos del sieglu pasáu, y la mano d’obra clásica conviértese en delles ocupaciones en, vamos llamala, inspiración intelectual.
La SGAE ye güei una de les entidaes (depués de los bancos) con peor imaxe y reputación del Estáu n’amplísimos sectores de la sociedá, y tienlo ganao a pulsu, ella solina. Porque una cosa ye defender los llexítimos derechos de los autores musicales y otra mui distinta aprovechase d’una mal entendida llexitimidá pa, única y esclusivamente, sacar toles perres que se pueda d’onde sía. Dicen protexer la música, pero resulta que munchos locales dexen de facer conciertos poles tases que tienen que pagar, colo que los grupos noveles tienen cada vez menos sitios onde ufiertar les sos creaciones. Recauden unos supuestos derechos de los autores que suenen nes radios, pero cásique nunca rexistren exactamente qué ye lo que suena nelles, colo que lo que xeneren artistes locales que nun pertenecen a grandes multinacionales nun se sabe mui bien ú va. Les compañíes discográfiques paguen por producir unos cedés, que lleven un canon por aquello (dicen) de la piratería, les cadenes que pinchen esos discos paguen, los locales públicos que ponen eses emisores paguen… nuna espiral que paez nun tener fin y na que’l día menos pensáu, al dir xiblando una melodía pela cai, va apaecer de secute, de detrás d’una sebe, una especie de cobrador del frac que va desixinos el pagu de derechos d’autor. Voi ponevos agora un supuestu y sacái les vuestres conclusiones: imaxinái que mercáis una camiseta y cada vez que la llevareis puesta nun sitiu públicu tuviereis que pagar por unos supuestos derechos de diseñu… Pos eso.
Ando mui quemáu ultimamente con tou esti asuntu, y les mancadures son yá de primer grau colo del festival Pueyes Rock. Que la SGAE-yos reclame más de 14.000 euros ye cenciellamente inalmisible; diz muncho de la insensibilidá d’esa entidá pa con unos rapazos que lo único que quieren ye dinamizar y diversificar la ufierta musical del so pueblu, organizando de manera exemplar un festival que diba garrando a cada edición mayor relevancia, de manera autoxestionaria y siempre cola mayor dignidá, y too ello ensin nengún ánimu de lucru. ¿Qué consiguió la SGAE cola so reclamación? Pos la gran fazaña de llograr que nun s’entamara l’añu pasáu y que cuerra peligru de desapaecer. Y otru asuntu alredor d’esta cuestión que me tien intrigáu ye: ¿d’ú salen esos 14.000 euros si la mayoría de grupos participantes nel Pueyes Rock nun pertenecíen a la SGAE y amás nunca se cobró entrada?
Ésti ye namás un exemplu, pero hai más, munchos más (ehí ta la problemática de la música tradicional), asuntos a los que los responsables de la SGAE respuenden abellugándose detrás de los miles d’autores que dicen defender y que, toi seguru, la gran mayoría d’ellos ta contra esta política recaudatoria insaciable y inxusta. Como diz esa máxima moderna: lo llegal nun tien por qué ser necesariamente ético.
