A manera de saludu y presentación
02/02/2010 a les 11:57:37 - Archivao en: PresentaciónVa ser ésta la primer vez que tenga un espaciu personalizáu onde poder escribir de lo que m’apeteza. Nun foi asina hasta agora porque nun sentía esa necesidá; ensin más, cuando quería espresar o pronunciame sobre dalgún asuntu facíalo na prensa, col grupu o nel programa de radio. Pero yera siempre d’una manera más formal, menos espontánea; agora, con esti blog apetezme falar de munches coses d’una manera más natural y abierta. Creo qu’esi ye’l cometíu d’estos espacios onde’l límite póneslu tu mesmu y les palabres (y el so sentíu) namás respuenden a l’autoría d’ún, ensin posibilidá de tracamundios o escaezos (intencionaos o non), como me tien pasao en bien d’entrevistes n’otros medios (prensa, radio o televisión). El casu ye qu’un blog, siendo como ye un «espaciu públicu» al que tol mundu pue acceder, tien un aquel d’intimidá mui especial; ye una especie de «puertu francu» onde espresate ensin más atadures que les que quieras tener. Ésti en concreto nun va responder más qu’a la mio conciencia, y les opiniones que pueda verter al traviés d’él van ser úniques y intresferibles. Individuales dafechu, non adscribibles a Dixebra, nin a Rockmería, nin a Discos L’Aguañaz, nin al Anuariu de la Música Asturiana. Ésto xustamente ye lo que más m’atrái d’esti formatu, poder falar y espresame sobre too aquello que produza en mi una opinión, un comentariu, una crítica, una allabanza, un análisis, un reproche, una alcordanza...
Munchos y bien variaos van ser los temes y cuestiones qu’alcuentren un sitiu en Salú ya dixebra. Lliteratura y llibros en xeneral, cómics, política, cultura y, por supuestu, música. De l’actualidá politica, a les alcordances personales, de les recomendaciones lliteraries o cinematográfiques a la crítica discográfica, de los conciertos a la reivindicación llingüística y nacional... too esto y muncho más (como se suel dicir) vais poder alcontrar equí y, eso sí, pa bien o pa mal, col sellu personal d’esti qu’escribe.
Va ser ésti un espaciu anárquicu, ensin orde nin regles preestablecíes, falando en cada momentu d’aquello sobre lo que me pruya pronunciame. Abiertu non solo pa min, sinón tamién pa toes y toos aquellos que queráis interactuar conmigo, comentando vosotres y vosotros lo que vos paeza bono o malo, digno d’aplaudir o refugar. Una comunicación directa, ensin intermediarios ente’l tresmisor y el receptor, esperando’l primeru pol flashback del segundu (na más elemental regla de la teoría de la comunicación), eso espero.
Bienllegaos a la mio humilde morada cibernética. Tais na vuestra casa.
