La caxa negra
15/02/2010 a les 21:49:09 - Archivao en: LliteraturaLlamárame Ambás esti día, que si m'apetecía quedar con ellos y falar, por menudo, del proxectu que traíen ente manes. “Son dos austríacos que tán faciendo una cosa mui rara en La Llaboral: entrugáronme que quien podía collaborar con ellos y, la verdá, namás se me pasó pela cabeza da-ys el to nome”, dixo. Finalmente, güei pasaron per equí Ángel Varela, un pravianu responsable, cultu y agradable de la programación teatral de La Llaboral, y Daniel Aschanden y Peten Stamer, los dos viesenes que-y tán dando vueltes a esa cosa tan estraña que ye la memoria personal y colectiva. Daniel Ascwanden, que fala un inglés pulcro, tien una coña tan asturiana que parez del país; Peter Stamer, vienés d'adopción pero suizu de nación, va esplicándome en castellano les característiques del so proyectu. ¿Taría yo interesáu en collaborar con ellos en desanubrir lo que tantes veces queda oculto? Falamos en clave, como si fóramos espíes que treslladen información comprometida. Simpatizo inmediatamente colo que faen Peter y Daniel: recuerdo los mios díes na Academia d'España en Roma onde yera posible, cada mañana, que la lluz propunxera un proxectu nuevu con un arquitectu, un pintor o un autor teatral; que'l proxectu llegara a nada, yera lo mesmo: como diz un refrán que me dicta la concencia, “Ente'l suañu y lo que se va facer, ta la suave sombra de lo fecho”.
Quieren indagar na memoria colectiva, familiar y social de los asturianos, y train la mirada llimpia y ensin complexos. Falamos dende los márxenes del nacionalismu y yo defendo les identidaes pasaporte. Intento esplica-ys por qué me molesta la identitidá española que propugna la FAES, por costreñidora, y quedamos d'alcuerdu en más dún puntu que Todorov yáenunció na década de los 80. Tuvieron xantando en casa y pidiéronme que mirara la so hrrp://www.myspace.com/lacajanegragijon. En determináu momentu, entrugáronme: -¿Por qué pienses que tamos equí? Contesté: --Porque l'asuntu de la identidá ye esencial na construcción de la idea nueva d'Europa. Yo tratélo na Hestoria universal del Paniceiros, nos Cuarteles de la memoria, volví a ello en La hestoria tapecida. Ye'l color de la época: en determináu momentu, toos falamos –por necesidá-- de lo mesmo.
