Paula Prendes: «N’Asturies hai munchu amiguismu en política»
13/07/2010 a les 11:57:41 - Archivao en: entrevistes
Esta xixonesa de 27 años llegó a Madrid hai dos años dispuesta a comer el mundu y, de momentu, parez que lo ta consiguiendo. La reportera nueva de Sé lo que hicisteis (SLQH) ta encantada col humor ácido que caracteriza al programa famosu de La Sexta.
Lleves unos meses trabayando en SLQH. ¿Cómo ta siendo la esperiencia?
Ta siendo bárbara y la verdá ye que toi mui contenta. Trabáyase muncho, eso sí, pero mui bien. Amás, l’estilu del programa préstame pola vida, porque me gusta muncho esi humor ácido que va mui bien cola mio personalidá.
¿Tienes miéu a convertite en flor d’un día?
Non, non. Sí ye verdá qu’al tar en SLQH tol mundu quier que salgas nes portaes de les revistes, facete entrevistes... Por eso hai que tener los pies en suelu y nun puedes dicir a too que sí. Nun quiero cargame de trabayu agora, ye meyor dir xestionando les coses poco a poco. Pa nun ser flor d’un día hai que facer poques coses, pero faceles bien.
¿Yá yes un personaxe famosu o ye’l programa’l que lo ye?
Parezme que les dos coses van de la mano. Ta claro que’l programa ye conocíu y ta más que consolidáu, pero ye verdá que desque entres a trabayar ehí conviérteste nun personaxe famosu.
Cómo dicía la otra, ¿a ti tamién te presta eso de tar nel candelabru?
[Rise] Llévolo un poco mal, porque cuando sales a tomar dalgo per ehí colos amigos yá nun tienes anonimatu. La xente pídete fotos, autógrafos, pregunta de too. Lo de que te reconoza la xente ta bien, pero namás pa cuando tas trabayando. Lo que peor llevo ye que los paparazzi tean tol día a la puerta de mio casa. Y la verdá ye que ta costándome bastante morder la llingua y nun ser desagradable...
Nes tos entrevistes sueles mete-yos muncha caña a los entrevistaos. ¿Facíes lo mesmo colos profesores del IES Piles de Xixón?
Non, non. Yo yera de les que-yos poníen bona cara y depués facía lo que me daba pola gana.
¿Por qué ta tán de moda la reportera femme fatal?
Nun sé si ta de moda o non, pero sí ye verdá que trunfa esi modelu de reportera. La realidá ye que ye dalgo mui innovador que se basa en modelos que gusten tanto a les muyeres como a los homes.
En política ún de los homes con más fama de duru ye Álvarez-Cascos... ¿Parezte que va volver al escenariu políticu asturianu?
[Rise] Nun me presta nada cómo ta Asturies en política porque cualquier partíu, cuando ta munchos años nel poder, acaba corrompiéndose. Y Asturies agora mesmo ye’l feudu d’Areces. Nun sé si Cascos va volver o non, pero sí veo bien qu’haya un poco de cambiu porque hai munchu amiguismu na política asturiana.
Si pudieres face-y dalguna pregunta ácida al presidente Areces, ¿cúala se t’ocurre?
Ui, qué difícil. Asina, de repente, nun sé qué dicite... Ocúrreseme que podía pregunta-y cuándo va dexar de tenenos condenaos al ostracismu n’España.
Ente tu y yo, ¿cómo andes de llingua?
L’asturianu préstame, pero como una cosa anecdótica. Esto igual nun-y parez bien a la xente, pero ye la verdá. Nel institutu, Sánchez Vicente yera’l mio profesor y nun tengo bon recuerdu [Rise].
Comentarios fechos (1)
pepis Fecha: 03/09/2010 a les 16:59:23
y luego dicen del catalán, pero esto es más dificil de entender! xD
