Los Chichos: «Namás cantamos a la xente que lo merez. Pa los de guante blancu, nada»
24/06/2010 a les 10:56:27 - Archivao en: entrevistes música.jpg)
Los Chichos visitaben Asturies hai unos meses pa presentar el so últimu trabayu Hasta aquí hemos llegado. Y nun ye poco porque, depués de 37 años nel mundu de la música, ehí siguen como'l primer día. ¡Fai fríu, compañeru!
Los hermanos Julio y Emilio González Gabarre y el fíu del últimu, Emilio González García, alias Junior, recibenme na cafetería del Hotel Cristal Naranco, n'Uviéu. Con ellos ta la inigualable Andrey Hepburn, que per un día dexó de dir a Tyffany y quedó sorprendida por esti grupu xitanu de rumba catalana. Mui atenta escuchaba la nuestra conversación...
Hai un añu que presentastis Hasta equí hemos llegao, pero ¿hasta ónde llegaron Los Chichos?
Los Chichos yá lleguemos y agora tamos garrando la cuesta abaxo pa tener fuerza y pillar impulsu.
37 años nel mundu de la música. ¿Qué vos parez que’l Gobiernu de Zapatero quiera xubir la edá de xubilación a los 67 años?
Nesi tema nosotros nun nos metemos porque nos va dar lo mesmo, vamos siguir trabayando lo que faiga falta. Amás, somos xitanos apolíticos...
Y eso de ser fenómenu musical de gasolinera, ¿cómo se lleva?
[Rinse] Mira, una vez en Barcelona hubo un paisanu que nos dixo que comprara un edificiu gracies a los casetes que vendiera de Los Chichos. Amás, queremos más vender en gasolineres a que nos escuchen de filu musical nun ascensor.
¿Qué cualidaes tien que tener un artista pa ser un chicho?
Somos irrepetibles, tronco. Somos rumberos completos, tocamos la guitarra, el pianu, el baxu, cantamos... Hai que tener de too. De mano, guapura; depués, cantar bien; y, pa rematar, saber interpretar. O, lo que ye lo mesmo, ser altu, roxu y de los güeyos azules. Pero desque baxamos del escenariu somos nosotros mesmos. De toles maneres, hai que nacer con esa alma y a nosotros tocónos ser asina.
¿Llévase bien que les mocines vos pidan autógrafos pa les güeles?
Tamos encantaos, porque como tenemos más años que los caminos cuando tamos actuando y vienen les moces a pidir autógrafos ye un honor. Home, depués pela cai ye que nin miren pa nosostros. Aparte, pareznos que ye una cosa normal, pídennos autógrafos pa les sos madres o güeles porque realmente son elles les que medraron cola nuestra música. Ye lo mesmo que cuando vienen a pidite que-yos dediques una foto pal mozu que ta na cárcel o pa la moza que nun sé que... Sentímonos arguyosos d’estes coses.
Llévase muncho’l llanzamientu de zapatu a los políticos. ¿Apuntáisvos a la moda?
Nosotros queremos más les tartes o los tomates. Somos más d’esi rollu...
¿A quién-y tiraríeis un zapatu del 45?
Pos mira, zapatu, Zapatero... Zapatero a los tos zapatos. ¿Ta claro, non?
Nel últimu trabayu de Los Chichos parez que s’echa en falta un tema sobre la crisis económica, ¿eh, ho?
Abondo tenemos yá colo que tenemos... Lo que queremos coles nuestres canciones ye evitar, precisamente, que la xente se ponga a pensar en males mayores y lo mal que lo ta pasando pa llegar a fin de mes. Nosotros tamos avezaos a falar de les cárceles, los presos, a cantar al sida, a la droga... Somos d’esi calibre y por eso cantamos a la xente que lo merez; a los de guante blancu, nada. Colos políticos val más nun perder el tiempu.
Pal próximu discu de collaboraciones, ¿meyor con Rajoy o con Zapatero?
Con nengún de los dos. Más bien tiraríemos con Mandela y namás. Lo meyor que-y podía pasar a España ye que nun mandara naide y qu’estos dos marcharan p’Haití a echar un gabitu.
La rumba, ¿ta anticuada?
Depende de quién la faiga. El que tenga oreyes pa oyer, qu’opine. Creemos que la rumba ye un estilu de música más alegre y nosotros nun facemos eso. La rumba rumba namás la fai Peret y Los Chichos lo que facemos ye contar grandes histories.
¿Cuála ye la filosofía de vida de Los Chichos?
Nosotros caminamos pela vida cola sinceridá y cola verdá por delantre, ensin mentires. Primero de nada hai que ser una persona humilde y tener los pies nel suelu.
