@La_Santina, perfil de Twitter: «Toi percontenta de tener instaláu’l wifi na Cuevona»
26/01/2012 a les 13:16:30 - Archivao en: entrevistes
Una cuenta satírica de la virxe de Cuadonga, defensora del movimientu de reivindicación llingüística, ta faciendo furor nes redes sociales y, en pocos meses, yá tien más siguidores que la mayoría de los políticos asturianos
Cómo ye eso de tener un perfil en Twitter? ¿Nun te basta con mirar de frente a la xente na cuevona?
Home, foi pura casualidá, surdió d’una conversación con Próspero Morán nel Café Trisquel de Xixón. Él ye un especialista nes redes sociales y foi’l primeru que m’echó un gabitu pa facer un perfil. En dos díes yá tenía 300 siguidores y agora acabo de pasar los 6.000. Toi mui agradecida col ciñu de la xente y percontenta de tener instaláu’l wifi na Cuevona. La trescendencia de les mios reflexones ye enforma mayor agora.
¿Y a la Santa Sé qué-y parez que bilordies na rede n’asturianu?
Reconozo qu’al vivir equí en Cuadonga nun soi una vecera habitual de los chigres de la nueche uviedina, pero toles veces que paré pela Santa Sé tuvi mui a gustu sacando semeyes cola xente y firmando autógrafos. Ye ún de los mios chigres preferíos y hai un ambiente de folixa mui sanu. Faime muncha gracia porque ellí llámenme la Lady Gaga asturiana.
Tu que tienes tratu col d’arriba, ¿Dios fala n’asturianu na intimidá?
Nun quiero falar mal del mio xefe porque a la Virxe del Acebu de Cangas yá-y llegó la notificación d’ERE y va pal paru seis meses como poco y yo ando col mieu en cuerpu. Eso sí, más que falar n’asturianu yo creo qu’emplega l’ESLEMA esi famosu, polo que-y lleo nos correos electrónicos que me manda pa lo de la mutua. Pue dicise que toi que me lleva Dios.
La to campaña en Twitter contra l’últimu anunciu de fabada Litoral foi trending topic la selmana pasada. ¿Qué problema tienes coles fabes?
Les lates de fabes foron siempre un iconu pal pop-art internacional. Sabíalo Andy Warhol y sabíemoslo tamién Pelayu y yo. Col trending topic algamáu damos un pasu alantre na visibilización del conflictu identitariu y llingüísticu qu’hai n’Asturies. De lo concreto a lo xeneral: de «las fabes y el embutido» a la oficialidá. Eso sí, faigan el anunciu que faigan, les fabes, pola receta del llibru de cocina de Maria Luisa. Tolo demás ye herexía.
Políticos como Francisco Álvarez-Cascos, Gabino de Lorenzo o Rivi tamién tienen la so cuenta nesta rede social, pero tu tienes munchos más siguidores qu’ellos. ¿Cuál ye’l secretu del to éxitu?
Nun creo qu’Álvarez-Helmets –como lu llamo yo– sepa siquiera lo que ye un follower; Gabino andará más esmolecíu por ver medrar a los cockers y Rivi onde tien siguidores ye poniendo moh.itos. El secretu ta en ser una mesma y falar claro. Como tengo cásique tantos siguidores como votantes tien el nacionalismu asturianu anguaño, toi por meteme en política. Úfrome a disposición del asturianismu pa lluchar pol mio conceyu o a nivel nacional y tirar pola xuntanza de la esquierda nacionaliega.
¿Recibisti dalguna reclamación xudicial de xente que tuviera dalgún accidente de tráficu a pesar de llevar en coche la pegatina de Yo conduzo, ella guíame?
El boom de les pegatines de Yo conduzo, ella guíame coincidió cola dómina de más puxu de los psicotrópicos na hestoria reciente d’esti país y convirtiéronse, polo tanto, nun artículu de primer necesidá, anguaño consideráu vintage polos moderninos gafapastes. Agora mesmo tamos nun procesu de reconversión nel que lo que ta de moda ye llevar una cruz de la victoria platiada xigante na lluna trasera y l’AS reivindicativu (d’Asturies) cola bandera d’Europa al llau de la matrícula.
¿Ye verdá qu’hai un censu de xente que morrió empapizao colos tos carambelonos?
Ye una entruga a mancar. En realidá metelos pa la boca d’una pieza ye una imprudencia tan grande como les que preparen los madrilanos andando de zapatinos y xarsé pela fastera de Los Picos. Lo que sí ye verdá ye que cuando camudemos pa los euros tuviemos que facelos un cachu más grandes, como los chicles d’a duru. Inda güei, comer un carambelu de La Santina d’una sentada sigue siendo una de les coses que meyor exemplifiquen el grandonismu asturianu anque vaiga ganando tarrén, adulces, el consumu de galletines pal café de L.luarca.
Los xugadores del Uviéu y del Xixón siempre van a vete pa facete la pelota, pero ¿tu a quién quies más? Porque nun se pue tar en misa y repicando...
Soi una fuina col asuntu del Sporting y Uviéu. Cuando vienen a veme tolos metrosexuales estos d’un y otru equipu yo pongo cara de cuatriada y salgo na semeya, pero anque nun soi muncho de fútbol la mio debilidá ye L’Entregu C.F., pol compromisu llingüísticu. Amás tienen un xándal de táctel perguapu. D’otra manera, he de tener procuru col sofitu deportivu a equipos, porque sé yo qu’anda’l Tribunal d’Arbitraxe Deportivu naguando por declarame doping.
Confiésate: ¿les perres que tira la xente al to pozu van pa un paraísu fiscal?
¿Qué pienses, que soi como’l xenru’l Borbón? Lo de les perres que paño del pozu ye un xaréu: ente que los hai qu’echen pesetes entá –hai que ser atuñón– y los que me tiren moneda foriato, paso les mañanes nel bancu. Eso sí, colo que saco toi remocicando una casa de piedra pa escontra Bual con horru y too. Toi tamién a ver si faigo unes camisetes de @La_Santina pa entamar a vendeles perdayuri y facer una espicha de baldre prestosa pa tolos y toles que queráis echar unos cantarinos y unos bailles conmigo...
