Karmele Marchante: «Nun soi pa enteder que l’asturianu nun sía oficial»
11/06/2010 a les 11:00:00 - Archivao en: entrevistes.jpg)
La frase «Nun tien pelos na llingua» parez que nació con ella. La periodista Karmele Marchante lleva venti años na profesión y sigue ensin dexar títere con cabeza. Defínese como agnóstica, independentista, antimonárquica, antitaurina... y una riestra llarga d’anti.
¿Y depués de lo d’Eurovisión, que?
Eurovisión foi arbitraria y antidemocrática porque m’eliminaron cuando yera la más votada. Amás, van pagalo caro, porque la persona qu’escoyeron nun va ganar y nin siquiera va tar nel top ten. De toles maneres, yo voi dir igual a Oslo a cantar nun teatru depués de qu’España fracase.
El tsunami Karmele, ¿quedó namás en tormenta tropical?
Non, ye una canción que suena en toles discoteques, ta arrasando con too. Va ser la canción del branu, pero ta previsto que pa ochobre muerra. Yá-y fadremos un entierru dignu...
¿Quién ye más periodista: María del Carmen Marchante Barrobés o Karmele Marchante?
Non, mira, ye que ye la mesma persona, nun hai diferencies nesi sentíu.
Anque yes fía de militar y yes de familia bien, confieses que yes independentista y votante d’ERC. ¿Qué te dicen en casa?
Soi agnóstica, antitaurina, antimonárquica... En mio casa yá tán curaos d’espantos. Entós, cualquier cosa que diga nun-yos importa, porque ente que-yos fai gracia y que nun lo entienden...
¿Lleves na cartera una foto de Carod Rovira?
Josep Lluis ye mui amigu míu y nin reniego nin tengo vergüenza de dicir que ye amigu, pero nun tengo por qué llevar una foto d’él na cartera. Toi lloca n’otru sentíu, pero nesi non.
¿Los catalanes nun quieren ser españoles, o los españoles nun quieren a los catalanes?
Mira, esto hai que lo esplicar mui bien pa que s’entienda. España ye un Estáu y dientro d’esi Estáu hai autonomíes, por exemplu, Asturies. El día que la ciudadanía d’una autonomía vote nes urnes que quier la independencia, eso tien que lo aceptar l’Estáu español. Y cuando pase eso, entós seremos independientes y yo voi tener trés pasaportes: el catalán, l’español y l’islandés.
¿Quién falará más catalán na intimidá: Aznar o Zapatero?
Aznar nunca faló en catalán porque ye un babayu, eso pa empezar. Amás, nin entiende catalán, nin sabe italianu, nin nada de nada. Dixo eso namás pa quedar bien.
Otra manera, Rodríguez Zapatero, al que yo tengo defendío abondo –y agora la verdá ye que me decepcionó muncho–, creo que tenía qu’aprender más idiomes. Amás, animo a qu’a Zapatero nun lu vote naide; a Rajoy y a toa esa panda, toos exiliaos cola povisa del volcán pa Islandia; yo apuesto por María Teresa Fernández de la Vega como futura presidenta del Gobiernu del Estáu español.
¿Los políticos asturianos falarán asturianu na intimidá?
Igual que’l catalán nos Países Catalanes [Remarca les palabres] falamos d’una manera natural y somos billingües, nun soi quien a entender por qué l’asturianu nun ye, a estes altures, oficial. Préstame muncho sentir falar n’asturianu y, amás, entiéndolo y puedo siguir una conversación.
¿Cuála foi la mayor mentira que se publicó sobre ti?
Sí, ho... Hai dos grandes mentires. Una, que soi la madre d’Eva Amaral, la cantante, cuando yo elexí llibremente nun tener criatures. Y otra, que me vieren bebiendo vinu sola nun chigre, cuando soi abstemia.
