Annie B Sweet: «Na vida, non siempre too ye dulce»
03/06/2010 a les 17:00:00 - Archivao en: entrevistes música
Ana López, más conocida como Annie B Sweet, ta consolidándose como una gran artista nel panorama indie. La malagueña inventa canciones dende que tenía 7 años y parez qu'agora, con 22 años, esa afición de neña ta cuayando.
En febreru del 2010 visitaba la sala Savoy, en Xixón y, hores antes, concedíanos esta entrevista na que dexa claro la so simpatía y, amás, nun muerde la llingua...
Inventes canciones dende los siete años. Qué infancia más dura, ¿nun te parez?
La verdá ye que me prestaba a esgaya porque m’aburría muncho cuando viaxábemos en coche con mio padre... Entós poníame a escribir canciones.
Ún de los discos que te cambió la vida foi The Wall, de Pink Floyd. ¿Díceslo porque dexasti d’aburrir a to padre en coche coles toos canciones?
[Rise] La verdá, nun foi por eso. En cuantes que sentí a Pink Floyd diome la vuelta too y púnxime a escuchar esi estilu de música y decatéme de que yera eso lo que me prestaba de verdá. En coche sigo cantando, pero cuando voi sola...
Siendo de Málaga, ¿qué votaríes nun reférendum sobre la oficialidá del andaluz?
Votaría a favor, por supuestu. Parezme qu’eso nun se tien que perder nunca y, amás, en nengún sitiu.
¿Sabíes que n’Asturies quieren facer una macroincineradora, van llenar l’occidente del país d’eólicos y nun reconocen la llingua asturiana?
La verdá ye que nun sabía nada d’esto... Pero una incineradora que contamina nun ye nada bono. En cuantes a lo del asturianu, yá te comenté que me gusta conservar eses coses. Si yo fora asturiana nun me parecería bien que nun se reconociera y taría a favor de la oficialidá de la llingua.
¿Con quién grabaríes un discu, con Manuel Chaves o con Javier Arenas?
Buf... Con nengunu de los dos. La verdá, nun m’atrae nada la política y nun tiro pa nengún llau.
¿Quién ye más indie: Anni B Sweet o Russian Red?
[Rise] Vaya pregunta que me faes, cuánta maldá... Lo que pasa ye que nun conozco a la cantante de Russian Red, entós parezme mui feo contestar a una cosa asina. Amás, yo nun sé lo que ye eso del indie, a lo meyor ella sí...
Cola que cayó n’Islandia, falando económicamente, ¿sigues pensando eso de que quies vivir ellí?
Sí, sí, pero eso dígolo un poco colos güeyos ciarraos, o meyor dicho, colos güeyos mui abiertos, porque me gusta muncho’l paisaxe islandés. Y por eso me prestaría dir ellí. Eses coses la verdá ye que les pienso nun mundu que ye ideal y onde nun hai sitiu pa la crisis nin pa nada malo. Siempre pensé que tener una casa n’Islandia nun diba tar nada mal.
Ente les tos películes favorites tán Where the wild things are y Into the wild. ¿Ana López va de salvaxe fuera de los escenarios?
Parezme que toos tenemos un puntu asina. Atreveríame a dicir que sí, que tengo los mios momentos. Na vida non siempre too ye dulce.
Dime dos motivos polos que la xente tien que dir a los tos conciertos.
El primeru, porque sentir música que nun se conoz siempre ye una cosa bona y si ye en directo, sobre manera. Y, depués, porque anque se conoza’l discu, sentilu en directo ye diferente, polo menos los mios. Amás, enriba un escenariu ye onde se ve a un artista de verdá, al natural, porque nun discu pueden facese munches coses pa que suenen bien.
La carrera d’arquitectura, ¿dexa tiempu pa componer canciones?
[Rise] La verdá ye que non, por eso lo dexé. L’arquitectura ye tan egoísta como la música y entós o voi con una o voi cola otra. Too a la vez nun se pue.
Tienes la oportunidá de confesate equí en publico de dalguna cosa oculta sobre la to persona. Un secretu inconfesable d’Ana López...
[Rise] Nun sé... Toi pensando en dalguna cosa que-y pueda chocar a la xente... Voi dicir que toi lloca por Opeth. ¿Val eso?
¿Y eso que te provoca la llocura qué ye?
–Ye un grupu de música heavy que tien unes canciones allucinantes. Fui a un conciertu d’ellos y faen un espectáculu mui real y les sos lletres son mui series. Un grupu mui bonu y mui recomendable.
