Los mayes
23/01/2012 a les 11:18:00 - Archivao en: Pablo MoroQue yo m’alcuerde, antaño, discursos en feches navideñes namás los daba’l rei. Daba ún, el de siempre, en Nuechebona, parecíu na forma cada avientu y vaciu nel fondu normalmente, como bien correspuende falar al que nun tien nada que dicir o, lo que ye peor, naide al que-y interese. Demostrao quedó esti añu en que’l monarca foi líder d’audiencia non porque los sos súbditos tuvieren esperando una palabra que bastara pa sanalos, sinón porque nesti país vese Sálvame na tele y el morbu del xenru negru poníanos a toos, hai que lo reconocer, un migayín cachondos. En Navidá, enantes, falaba’l rei, digo. Y más naide.
Pero igual que de ralo en ralo se ponen inesplicablemente de moda los coches blancos, nos últimos años vinieron asomándose a les nuestres celebraciones los egos de los nuestros mandatarios en forma de mensaxe navideñu, col tafu a resume anual de la cosa pública maquilláu de poesía épica y barata. Los últimos Fines d’Añu (por aquello de nun molestar) viemos a presidentes de comunidaes autónomes dar ánimos a los sos conciudadanos citando a tolos clásicos habíos y por haber, insuflar optimismu pa encarar les adversidaes y recordarnos que somos, cómo diría un amigu míu, tan bona xente que somos nefastos.
El nuestro PacoCascos (llueu vamos recuperar esta terminoloxía de la etapa madrilana) nun foi menos qu’otros na so arenga llírica del añu vieyu. Pero, depués de sentilu, acorrompináu d’asturianía como me dexó y valerosu énte cualquier pilancu que se me presente, nun pudi más qu’echar en falta una palabra d’aliendu énte la profecía apocalíptica del 2012, porque, puestos estupendos, nun hai problema más grave, al mio parecer. O será que p’Asturies yá empezó’l fin del mundu y los mayes tienen nomes raros como De Guindos, Montoro, Soraya y Rajoy.
