Riestra de morcielles
19/01/2012 a les 13:28:03 - Archivao en: opiniónVa unos díes, una persona d’esti periódicu, sabiendo que pasara la ponte faciendo la matanza, retóme en broma a que na columna tratara sobre cómo se faen los chorizos. Yo, siendo de Grillero, nun podía dexar pasar de llargo un retu y prometí meter el tema fora como fora y escribiera sobre lo qu’escribiera.
Morcellar, o meter morcielles, nel llinguaxe actoral significa improvisar palabres o frases fuera del guión escritu. Y igual qu’hai dellos tipos de morcielles –asturiana, matachana, moscancia, de Burgos...–, tamién hai distintes morcielles actorales.
Tán les que-y dan viveza y credibilidá a un personaxe, sobre manera cuando esti ta en comedia. Una bona morciella metida a tiempu pue facer saltar la risa del públicu, inclusive la del compañeru d’escena, dando más naturalidá a lo qu’asocede. Tán les que surden espontáneamente o les qu’apaecen como parte del testu escritu y conviértense en daqué característico del personaxe cola so repetición, por casu, la del personaxe de Luisma n’Aída: «Claro, como’l Luisma ye tontu». Y, p’acabar, tán les más odiaes, les qu’usen de contino los llamaos actores morcelleros, que’l so únicu oxetivu ye allongar el testu y, polo tanto, el so protagonismu n’escena.
Anque, por mui actriz que sía, tengo que reconocer que, de morciella, lo que más me gusta ye lo que fai mio madre.
