Yo, que nun yera casquista
06/10/2011 a les 10:47:43 - Archivao en: ActualidáYo, la verdá, nunca fui un casquista; quiero dicir siguidor de Francisco Álvarez-Cascos. Y, muncho menos, del PP o facha o conservador o como quieran más. Y, home, marxista o progre, o d’esquierdes puru y duru, pues igual tampoco. Con too y con eso, reconozo qu’hai trenta años convencíame más el discursu de Felipe González que’l de cualquier otru y que, en clave asturiana, siempre-y tuvi un gran apreciu a Pedro de Silva como presidente. En cualquier casu nunca llegué a votalos, más que nada porque naquellos años ochenta yo nun algamara tovía la mayoría d’edá. Eso quier dicir que pertenezo a la xeneración que s’enfrentó a les urnes pela primer vez pal referéndum de la OTAN. Y que soi de los que votaron non y perdieron.
Digo esto pa qu’entiendan que, con esos precedentes, nunca me quedaron demasiaes ganes de que me volvieren a engañar con palabres seductores y promeses electorales abstractes.
Daquella yo yá empezaba a tener dos compromisos públicos básicos. Unu yera, vamos dicir, col pacifismu o con una concepción mui escandinava de lo que podía ser la nuestra neutralidá en política esterior y del papel que’l nuestru exércitu tenía que xugar en política interior. Y, entós, yá cuando estudiante, decidí faceme oxetor de conciencia. Ente otres coses porque entendía que lo de la mili obligatoria yera un arcaísmu qu’había que desaniciar. Y, les vueltes que da la vida, a lo último, el que terminó quitando la mili foi un Gobiernu de dereches –cosa que foi un gran aciertu– y yo acabé convencíu del mio pequeñu error naquel referéndum y de que, como europeos, nun teníemos otro que pertenecer a la OTAN: dos amueses más de la diferencia que suel haber ente retórica y realidá.
Pero, como digo, tenía tamién un segundu compromisu: yo quería –y sigo queriendo– pa la mio llingua y pal mio país el mesmu nivel de reconocimientu y normalidá qu’empezaben a tener otros. Yo quería un Jordi Pujol o un Garaikoetxea pa la mio tierra. Yo quería una fuerza propia en parllamentu. Y esa querencia llevóme a ser asturianista.
Agora, la sensación que tengo ye que lo de la mili obligatoria pertenez al pasáu pero que lo del asturianismu lleva trenta años de retrasu. Avances hubo y retrocesos tamién. Pero –les vueltes que da la vida– a lo último, un señor al que contábemos conocer bien, Francisco Alvarez-Cascos, ta consiguiendo non namás qu’un partíu asturianu entrara nel nuestru parllamentu, sinón que gobernara, que reclamara l’arguyu de ser asturianos y que nos veamos a puntu de tener un grupu parllamentariu nuestru en Congresu y en Senáu. Por eso, yo –como tantos otros– igual nunca fui un casquista de tola vida. Val. Pero puen tar seguros de que llevo tola vida queriendo ver una oportunidá como esta y que nun pienso esperdiciala.
Comentarios fechos (4)
Inaciu Iglesias Fecha: 11/10/2011 a les 08:00:11
Xermán: Voi intentar desplicate lo que pasó nel últimu plenu en Noreña adelantándome al mi siguiente post. En poque palabres, esta selmana d'atrás los compañeros de Conceyu Abiertu presentaron una moción pa esixir al Alcalde que tomara una serie de midíes en defensa del asturianu. Yo tar, taba d’alcuerdu col fondu del asuntu. ¿Cómo nun lo voi tar? ¿Cómo nun voi tar a favor de la defensa del asturianu? ¿O qué ye que tengo qu’andar enseñando ceritificaos de buena conducta asturianista a estes altures? Pero’l problema nun yera ési. El problema yera que, tal como-y dixi por tres vegaes y hasta l’últimu momentu, al portavoz de Conceyu Abiertu, había defectos evidentes na propuesta. Defectos qu’aconseyaben retirala, refacela, negociala, presentala en comisión y, depués, consiguir aprobala en plenu pero non como una simple moción, sinon como unes ordenances que regularen l’usu del asturianu na Casa Conceyu d’equí pa en delantre. Pero nada d’eso se fexo. Por contra, decidiose siguir alantre cola moción. Y, claro, nun pasó la primer peñera. Yo nun m’opuse; abstúveme; pero da igual: si llega aprobase, tampoco nun diba valir pa nada. Y nun diba valir pa nada –aparte de pa enseñar cuánta razón tenemos- porque, insisto, pretendía obligar al Alcalde a facer una serie de coses a les que nun lu podemos obligar vía plenu. Aparte de llamalu autoritariu y intransixente. Y aparte d’apoyase na llei d’usu que -a ver si nos vamos enterando- nun obliga a les alministraciones locales nin a la central: obligar, obliga namás a l’alministración autonómica. Y a ver si d'equí a poco podemos dar una alegría y una solución a esto. Saludos
Xerman Fecha: 08/10/2011 a les 23:38:05
Eso nun casa muncho cola to astención en Noreña a la moción sobre l'usu del asturianu... Habíes d'esplicalo porque ente la "retórica" (dicir que se defende la llingua) y la "realidá" (facer pa nun defender la llingua) hai una contradicción qu'a munchos mos suena a más de lo mesmo, vamos, lo que tuvo faciendo'lPSOE tantos llaceriosos años...
Xosé Fecha: 07/10/2011 a les 18:13:52
Ja, ja, ja, ja, ja, ja, ja, ja, ja, ja, ja, ja, ja, ja, ja, ja, ja....con estes "cuatru palabres" del nuesu Inacio tengo jajás para cuatro meses....
Xosé Fecha: 07/10/2011 a les 17:51:35
Ja, ja, ja, ja, ja, ja, ja, ja, ja, ja, ja, ja, ja, ja, ja.......
