Ser propietarios nun ye fácil
30/06/2011 a les 13:17:11 - Archivao en: ActualidáSer propietarios ye mui complicao. Hai que tomar decisiones difíciles y incómodes, tar tol día sollerte, atender los detalles y mirar de regüeyu pa que naide te quite lo tuyo. Pero, al tiempu, hai que ser a albidrar el futuru, escoyer bien les aliances y enfotase nos profesionales que lleven la xestión dándo-yos capacidá abondo de decisión. Ye complicao. Ye un equilibriu difícil de caltener, pero nun hai otro: la única manera de dexar los problemes ye perder la propiedá y eso ye tanto como dicir que, muertu’l perru, acabó la rabia o que los aforcaos son los únicos que yá nun carecen de la columna. Y non. La propiedá pue vendense, val –eso ye un intercambiu comercial–, pero escaecela o perdela por desdexala ye una indolencia imperdonable.
Y cuando falo de propietarios nun falo pa unos pocos. Ún de los mayores problemes económicos –y políticos– de les últimes décades ye precisamente la tremenda indefensión de los propietarios énte’l, cada vuelta, mayor poder de los xestores, de los alministradores, de los executivos. Una indefensión que s’enseña en dos momentos evidentes. Unu, a futuru; ello ye, cuando hai que tomar una decisión y los únicos que disponen de la información p’alministrala son los encargaos, los funcionarios, los profesionales, mentes qu’a los dueños nun-yos queda otro qu’aplaudir la propuesta o quedar albentestate. Ya saben; el famosu o nós o’l caos: o se fai lo que nós proponemos o les consecuencies van ser apocalíptiques... Y, dos, a pasáu; ello ye, cuando los aciertos de los xestores queden pa ellos mesmos pero los sos errores págenlos tolos dueños. Yá saben tamién: la conocida manía de privatizar los beneficios y socializar les pérdigues.
Los bienes públicos tamién tienen propietarios. Y eso inclúi les caxes d’aforros. Eso de que lo que ye de tol mundu nun ye de naide ye una gran verdá que tendría que dexar de selo. Ser propietarios de bienes públicos ye complicao, mui complicao. Y más si son perres. Como copropietarios del común, tenemos que nos enfotar nos nuestros representantes dándo-yos la capacidá de tomar decisiones por nós. Val. Pero hasta ciertu puntu namás. Esa ye la clave: entender hasta ónde lleguen les nuestres obligaciones como propietarios y nunca permitir, por desdexamientu, que naide tome les decisiones por nós. Tan malo ye que los propietarios se metan a xestores como que los xestores se metan a propietarios. Y si-yos cuento too esto ye porque parezme qu’eso, precisamente eso, ye lo que ta pasando con Cajastur: que nós, la sociedá asturiana y les sos instituciones –ello ye, los sos llexítimos propietarios– tamos escaeciendo les nuestres obligaciones.
