Los gobernantes, a gobernar
25/10/2011 a les 13:23:53 - Archivao en: ActualidáSí, sí: los gobernantes tienen que gobernar; por supuestu. Pero la verdá ye que lo de Bélxica da qué pensar. Lleven nun sé cuántos meses –años yá, en realidá– ensin apautase pa formar Gobiernu y son ún de los países de la Unión que meyor tán aguantando la crisis. Tán medrando, inclusive. Casualidá nun ye y igual la desplicación hai que la atopar en que lo que realmente ta faciendo l’Executivu belga –yá saben: la cadarma profesional– nun ye otro que cumplir la llei, garantizar los mínimos y dir pel llibru. Nada d’inventos; les cuentes clares y tonteríes les xustes: ési ye’l secretu.
Salvando les distancies y en clave local, alcuérdense de cómo’l Sporting de Xixón empezó a salir del furacu económicu nel que taba desque lu alministren unos interventores concursales que lo único que faen ye dir pel llibru y cuadrar les cuentes. Nun entienden de fútbol, nin de grandes proyectos ilusionantes, nin de contabilidá creativa: namás saben que, pa equilibrar un balance, los ingresos nun tienen qu’arreblagar nunca pelos gastos. Y con esta obviedá, y una calculadora de bolsu, tán sacando del pozu lo que parecía que nunca diba poder salir.
La capacidá del ser humanu pa prosperar ye infinita. L’instintu de supervivencia, tamién. Y el mayor problema –lo que más nos impide avanzar– ye facese trampes al solitariu. O robar. O engañar al pueblu. O les tres coses al tiempu.
Y a mi, como a ustedes, parezme un escándalu que los mesmos alministradores de les caxes d’aforru que llevaron a les sos entidaes al desastre anden agora reclamando indemnizaciones millonaries por culpa de nun sé qué contratos blindaos. Ye una indecencia y un desastre total. Y lo único que me consuela ye pensar que, cola que ta cayendo, munches d’estes práctiques que primero conocíemos y tolerábemos, yá nun les vamos almitir más.
Por eso anecio en que lo que más aprecio d’unos gobernantes ye que lleven bien les cuentes, que nos digan a la xente lo que realmente ta pasando y que nun nos engañen con proyectos creativos que namás son a caltenese en papel. Y si la realidá ye dolorosa, dura y dramática, pos más tovía.
Eso ye gobernar: alministrar los bienes comunes como si foren los de la nuestra propia familia. Y eso ye lo que tenemos que facer les families: alministrar meyor los propios númberos como si tuviéremos que rindir cuentes a un conseyu d’alministración o a un parllamentu implacable. Tenemos qu’aprender a tomar meyores decisiones económiques, a ser más rigorosos, a cuadrar ingresos y gastos y a dir pel llibru. Y si lo facemos, ciudadanos y Gobiernos, toi convencíu de que, xuntos, vamos salir d’esta.
Comentarios fechos (1)
Aurora Fecha: 01/11/2011 a les 11:56:22
Totalmente d'acordo, Inaciu. Agora dígoche eu que, no caso das familias, en algunhas nun hai nada qu'administrar. É parecido a un goberno, sí; pro nun é o mesmo. Os gobernantes sempre teñen algo qu'administrar, pra eso se cobran contribucióis e demáis. Anque atopen as arcas baleiras, saben que, d'unha ou outra maneira sempre ha d'haber algo... D'acordo, administrar o qu'hai e facelo de maneira honesta e rigurosa. Xa quixeran muitas familias ter, alomenos, a esperanza de ter algo qu'administrar nun futuro.
