La primera, na frente
19/01/2012 a les 10:45:51 - Archivao en: ActualidáHai que ver lo poco que duren dalgunes allegríes en casa’l probe. A pocos díes de tomar posesión como presidente del Gobiernu español, Mariano Rajoy acaba de xubir los impuestos.
Ye verdá qu’a naide-y tenía que sorprender una midida d’esti tipu viendo cómo tán les coses. Son tiempos d’axustes económicos, de recorte del gastu públicu y de mayor esfuerciu pa los ciudadanos. Pero tamién ye verdá que’l propiu Rajoy afirmó en campaña, hasta l’últimu minutu, que nun diba facer lo qu’acaba de facer.
Les promeses electorales tán pa incumpliles, repiten dalgunos cínicos. Pero una cosa ye callar –y otorgar– y otra, bien distinto, afirmar una cosa pa facer exactamente la contraria. Va ser difícil que terminemos sabiendo si esti cambiu d’opinión forma parte d’una estratexa perfectamente premeditada a tres tiempos que buscaba, ún, callar lo obvio en precampaña pa ganar les elecciones; dos, adoptar les midíes más dures agora, a lo primero la llexislatura, cuando inda nun hai capacidá de reacción; y, tres, dexar pa lo último los planes más populistes buscando la reelección. O si, al revés, esti cambiu d’opinión tan radical respuende a que los datos económicos qu’atoparon yeren tan estremaos a lo esperao que nun-yos quedó otra que desdicise de lo dicho.
Como digo, va ser difícil que lo terminemos sabiendo a ciencia cierta, pero hai dos datos qu’a mi nun me presten gota. El primeru, que llama enforma l’atención que depués de repetir que’l trespasu de poderes –que duró un mes, nun hai que lo escaecer– taba siendo exemplar, descubran, en malapenes cuatro díes, un furacu económicu tan bultable. Y el segundu, qu’esi furacu –o diferencial nel porcentaxe de déficit, pa ser más precisos– correspuenda básicamente a les comunidaes autónomes, que –tampoco nun hai que lo escaecer– tán gobernaes mayoritariamente pol propiu PP.
Cuento qu’habrá xente qu’empiece a tar arrepentío de dar el votu al señor Rajoy. Ente otros, por cierto, el diputáu asturianu de Foru, Enrique Alvarez Sostres, que lu apoyó na investidura ensin contrapartíes concretes.
Pero, bono, yo parezme qu’igual tampoco nun hai que s’acelerar tanto. Los cambios d’opinión nun pueden ser tan azotaos. Y, pa ser sinceros, a naide-y pue estrañar que se tengan que xubir los impuestos o que se tengan que recortar los gastos cola que ta cayendo. Al revés, la verdadera discusión ta en decidir enriba de quién van cayer esos sacrificios. Ehí, ehí ye onde empieza’l xuegu y onde va haber que tar bien sollertes. Vienen tiempos mui duros.
