Gobernar pa cuadrar les cuentes
15/09/2011 a les 16:18:19 - Archivao en: ActualidáNes primeres selmanes, xusto depués de la toma de posesión d’Alvarez-Cascos como presidente del Gobiernu asturianu, la principal acusación de la oposición yera la falta d’iniciativa del nuevu Executivu. Agora yá non. Agora la llinia argumental de l’Alministración saliente yá ta siendo otra. Una llinia que podría resumise nes últimes declaraciones del anterior presidente, Álvarez Areces, onde afirma que «destruír tolo que se fexo diba ser un suicidiu colectivu, nun lo podemos permitir».
Bien. Cualquier Gobiernu entrante tien que s’apoyar na herencia recibida. Eso ye inevitable, pa lo bono y pa lo malo. Y, polo tanto, cualquier Alministración, cuando llega, tien la obligación de conocer, reconocer y enseñar l’estáu de les cuentes qu’atopa. Pa lo bono y pa lo malo. Nesti sentíu, de la mano del nuevu Gobiernu tamos conociendo un par d’evidencies contables que, simplemente, nun podemos inorar. La primera d’elles ye la existencia de doscientos once millones d’euros –que son bien de millones, oiga– en factures perfectamente reconocíes pola anterior Alministración, pero sospechosamente consignaes fuera de los presupuestos. Esto, sumao a les demás cuentes, trai consigo una consecuencia inevitable: pongámonos como nos pongamos, Asturies nun ta cumpliendo los compromisos de déficit impuestos pol Gobiernu español y la Unión Europea. Inda más: en tolos años que llevamos yá de recesión, nunca fiximos demasiao por cuadrar les cuentes nuestres. Al revés, dediquémonos a gastar siempre más de lo qu’ingresábemos y en cada semestre fomos aumentando, a costafecha, el nuestru déficit presupuestariu. Por eso, énte esta evidencia plasma tovía más la repuesta del nuestru ex-presidente, pal que la situación n’Asturies «nun ye dramática, dexemos una herencia saniada y la rexón tien el menor endeudamientu d’España». Hai optimismos qu’asusten.
Gastar más de lo que s’ingresa ye siempre discutible; pero gastalo mal, directamente, nun tien perdón. Y ehí entramos na segunda de les evidencies que vamos conociendo adulces: la de los gastos que nun se pueden comprobar porque, simplemente, nun existe la documentación que los evidencia. Otra vuelta’l doble xuegu, la contabilidá relaxada. El casu más evidente: el del informe de la Intervención Xeneral del Principáu sobre les cuentes de la Fundación Niemeyer. Ye un informe que bien que remarca esta carencia y que naide retruca. Tolo más, llevántase enforma la voz y arguméntase lo mui importante que ye la institución pa la ciudá y lo muncho que se trabayó pa consiguila. Pero resulta que nun ye esa la cuestión. El verdaderu problema ye que les perres publiques –y les privaes tamién– tienen que se xustificar y documentar de manera suficiente y evidente. Ésa, ésa ye la cuestión.
Y poner orde n’estes coses ye gobernar: vaya si lo ye.
