Fabada asturiana
23/08/2011 a les 14:03:14 - Archivao en: ActualidáPocu pan pa tantu chorizu, protesten los indignaos y yo, como conceyal del Conceyu de Noreña –villa chacinera por definición–, siéntome aludíu. Y, por alusiones, anecio en que vamos tardar un tiempu en decatanos cómo, cuánto y de qué manera los asturianos acabamos de camudar la nuestra cosa política. Cómo valtemos un Gobiernu y dimos vuelta a les nuestres instituciones; cuántos mitos y prexuicios venimos de tirar embaxo; y de qué manera fomos quién a entamar esta revolución: una revolución pacífica y democrática. Nun nos fixo falta cambiar la llei electoral, nin ocupar les places, nin llantar auquiera tiendes de campaña. Non. Aprovechemos les elecciones y dimos el votu masivamente a una opción nueva. A una opción nuestra, reformadora, ciudadana y, lo que ye más relevante, a una opción asturiana.
Ye verdá que foron más los asturianos que nun votaron a esta nueva opción que los que-y dieron la so papeleta. Ye verdá. Y meyor asina. Porque eso va obliganos a tol mundu –a ganadores y a perdedores– a facer un exerciciu de convivencia real. Tol mundu pidimos agora llistes abiertes y respetu a les minoríes. D’un tiempu a esta parte, eso ye lo políticamente correcto. Bono, pos, pa bien o pa mal, col nuevu panorama políticu que venimos de danos eso, exactamente eso, ye lo que vamos tener los asturianos. Y en Noreña, más. Y nun va ser fácil, nun va ser gota fácil, pero nun nos queda otro: empieza una dómina nueva, una dómina de convivencia nel nuestru país y estes son les regles del xuegu. Valió de tonteríes y llugares comunes; agora toca escaecer les etiquetes: d’equí pa en delantre’l movimientu tien que s’enseñar andando.
Nes últimes décades tuvimos qu’aguantar bien de tópicos y llugares comunes. Que si una opción asturiana nun tenía sentíu en política. Que si tar arguyosos de la propia identidá yera’l primer pasu p’acabar siendo escluyentes. Que si demandar el reconocimientu de los derechos civiles d’unos falantes yera una imposición al común... En fin. Queda muncha xera per delantre pero esta nueva sociedá que tamos llevantando a comuña, esta nueva manera d’escoyer a los nuestros representantes, esti nuevu reposicionamientu de les mentalidaes son los ingredientes precisos pa la nueva fabada asturiana que tenemos que cocinar. De nós depende, asina que, compatriotes, bon provechu.
