Cuñes de la mesma madera
13/09/2011 a les 11:37:02 - Archivao en: ActualidáDefinise como nacionalista asturianu ye mui engedeyao. De mano, hai que desplicar a demasiada xente lo que significa esto. O, pa ser más precisos: lo que nun significa. Existen demasiaos precedentes esteriores –dalgunos dramáticos– qu’anubren cualquier intentu de discusión racional. Hai demasiáu ruíu y eso provoca que tol mundu tenga una idea preconcebida de lo que significa ser nacionalista, de tolo malo que significa ser nacionalista pero que mui pocos paren a pensar si, realmente, esos prexuiciu casen cola realidá. Aparte, hai otres razones añadíes que dificulten la expresión normal d’esta idea, d’esa ideoloxía. Una d’elles ye la posición respective a los otros nacionalismos: cuándo hai que los ver como enemigos y cuándo son aliaos.
Yo, de mano, soi poco amigu d’enfrentamientos y faigo lo más que puedo por entender les razones del contrariu. O del que nun piensa como yo. Por eso veo mui pocos enemigos más p’allá de les barreres que nos pongamos nós mesmos. Con too y con eso, hai cuestiones que siguen pareciéndome contradictories y coles que, albidro, vamos tener que convivir siempre. Una d’elles ye qu’a munchos de los que se definen arguyosamente como españoles –y, polo tanto, podríemos calificar d’españolistes– molésta-yos que los llamen nacionalistes. En principiu son sinónimos, pero ellos nun se terminen de reconocer nesi términu. Ente otres coses, y ehí ta la contradicción, porque entienden que’l sustantivu nación ye namás aplicable a España. Sí. Pero, sin embargu, l’axetivu nacionalista, non; eso queda reserváu namás pa los otros: precisamente p’aquellos otros colectivos que reivindiquen naciones qu’esos españolistes nun reconocen.
Otra contradicción propia del nacionalismu ye saber si tien qu’haber, por definición, más complicidá ente los nacionalismos periféricos o, al revés, ente estos y el nacionalismu español. O, dicho n’otres palabres más grueses: si existe un únicu y evidente enemigu común. De primeres, munchos cuenten que sí: qu’ente nacionalistes periféricos hai más complicidá y que l’enemigu siempre ye España. Pero, como digo, bien de vueltes la realidá arruina esi gran titular. Por exemplu: un nacionalista español podría apoyar una gran inversión n’Asturies en cuenta de, por exemplu, en Cataluña; un nacionalista catalán, nunca. O, visto d’otra manera: si existe un exemplu de complicidá evidente a lo llargo del tiempu ente nacionalismos peninsulares ye la que se vien dando ente’l nacionalismu español y el catalán. Ye una clásica rellación de pareya –con toles sos contradicciones– na que los dos amantes tan tol día engarraos pero nun son a vivir ún ensin l’otru. Y eso llévanos, na mio opinión, a una última y esnidiosa contradicción nacionalista: la de que pa compensar el pesu de los otros nacionalismos tengamos falta de favorecer otru nacionalismu más, el nuestru.
