Agora non, qu’entro de serviciu
29/09/2011 a les 11:24:29 - Archivao en: ActualidáHai una escena na película Torrente que ye mui gráfica y vien al casu. Entra’l detective Torrente –yá saben: el clásicu babayu que representa lo peor de toos nosotros–, entra, digo, nun chigre y pide un vasu. Y depués, a tou correr pide otru y otru y otru más. Cuando yá lleva media docena de güisquis en cuerpu, vuelve pregunta-y al chigreru la hora. «Falta un minutu pa les doce», contésta-y. Y, entós, Torrente ponse mui seriu y diz: «Entós para, qu’entro de serviciu».
Ye difícil establecer cuál ye’l minutu ceru en qu’empiecen les propies responsabilidaes; por exemplu, la de nun beber tando de serviciu o la de cuadrar les cuentes. Pero ta claro que la herencia recibida inflúi y muncho. La oposición asturiana fai mui bien controlando al nuevu Gobiernu con rigor y criteriu. Igual que’l Gobiernu central cumple cola so obligación reclamando firmemente al executivu autonómicu’l cumplimientu de los compromisos comunes de déficit. Pero llama l’atención la distinta vara de midir d’unos y otros. De mano, plasma ver cómo’l mesmu Gobiernu central que foi tan comprensible y displicente col déficit qu’acumuló añu tres añu l’Alministración autonómica saliente, enseña agora una impaciencia, como poco, chocante. Yo diría qu’electoralmente chocante. Igual que plasma tamién ver a los portavoces autonómicos de la nuestra oposición esixir comparecencies y execuciones inmediates de proyectos cuando tuvieron tantes llexislatures atrás pa facelo y nun lo fixeron. Pero eso nun ye lo peor. Lo peor ye que munchos d’estos desaxustes y incumplimientos tán conociéndolos agora, igual que gran parte de la oposición y tola opinión pública asturiana, precisamente de la mano del nuevu Gobiernu. Colo que la paradoxa ye doble: tamos queriendo matar al mensaxeru por contanos, non lo que pasó na casa d’enfrente y nosotros nun podíemos saber, sinon lo que tábemos viviendo na nuestra propia casa y nun fiximos nada por entender. Pero, si me lo permiten, yo diría que la paradoxa ye inclusive triple: los mesmos qu’agora anuncien rigor colos númberos del déficit, van recompensar a los propios responsables d’incumplilos con un puestu de representación destacáu y ye que, como sabrán, hai munches posibilidaes de que l’ex-presidente Areces encabece la llista asturiana al Congresu o al Senáu pol partíu socialista nes elecciones xenerales vinientes.
Cualquier Alministración tien como oxetivu ganar la reelección. A mi eso nun me preocupa. Cuento, inclusive, que la tensión electoral ye bona pal sistema y que l’exame al que sometemos a los nuestros alministradores cada cuatro años ye imprescindible. Pero d’ehí al electoralismu frívolu, al populismu ramplón, hai un cachu. Y enseñase agora como indignaos pol descuadre de les nuestres cuentes –qué quieren que-yos diga– entra dientro d’esi cachu.
