La Banda de Gaites de Corvera
13/12/2011 a les 10:01:34 - Archivao en: dolfoPerdí unos prestosos minutos buscando un títulu afechiscu, que llamare l'atención por ser xuegu de palabres ocurrente (Cola música pa esta parte), que resumiere de manera prevocadora (¡Déxate de gaites!) o reivindicativa (La Banda de Gaites de Corvera y el Niemeyer en New York) lo que quería compartir… Pero acabé por poner lo que ye debío, un mundu sensorial, un proyectu de país alternativu…: la Banda de Gaites de Corvera.
El martes 13 d'avientu, a les 20.30 hores, han recibir nel Teatru El Llar de Corvera'l Premiu a la Meyor Trayectoria Saint Patrick's Day Parade, reconocimientu que va entregar en persona John Dunleavy, Chairman del comité organizador d'una de les mayores celebraciones de lo celta que se faen nel mundu.
Avezaos como tamos a les respetabilísimes panoya de bronce de nun sé qué asociación o cebollín de lata de nun sé qué tertulia, corremos el riesgu de relativizar toa distinción, de facer tabla rasa y nun ser quién a destremar cuánto de too ello ye importante y cuánto ye foyaraca…
Y esti actu, esti homenaxe a una formación (la Banda de Gaites de Corvera: una referencia pa les músiques tradicionales del Estáu) y a una persona (Bras Rodrigo) entra, ensin que naide –y muncho menos los animosos animadores gastronómicos– nun s'ofienda, nel planu de lo sustancialmente importante, de lo ontolóxicamente importante, de lo indiscutiblemente importante.
Dunleavy ye ún de los nomes que conformen l'alma de la gran parade neoyorkina… Y, en xunto con otros delegaos, nun tien mayor problema n'andar los 8.000 kilómetros que lu separten de Corvera pa venir a dar una palmada en llombu a los gaiteros asturianos. Otros, triste y paradóxicamente, nun van ser quién nin p'andar los 800 metros que los separten del auditoriu corveranu.
Nel casu d'esa delegación cultural de primer nivel llámase xenerosidá. Nel casu de los ausentes –nun tien otru nome– llámase mezquindá. Podría ser un episodiu de Barriu Sésamu pero nun lo ye. Más nada ye un nuevu capítulu d'un serial que'l martes 13 protagoniza'l Barriu de Les Vegues y que, mañana o en pasao, protagonizarán otros pueblos, ciudades o llugares d'esti descerebráu, pintorescu… bizarru país.
Y el casu ye que los más nun van tar ehí non porque sían profesionales de la envidia –que tamién– sinón porque nun saben qué ye lo que se celebra… Porque ignoren que Bras Rodrigo ye unu d'esos (polémicos) creadores que va (radikalmente) por llibre. Ambiciosu (y eso ofiende a los neandertales pre-sidrón que mos representen –sía no político, sía no cultural, sía mediáticamente–), duru (con él mesmu y colos d'él) pero innegablemente rigorosu, tiernu (más nada hai que lu ver colos amigos o con esa fía…), coherente (y eso asusta), hipercreativu (si nun arriesga, abúrrese)… Porque nun caen na cuenta de que la Banda de Gaites de Corvera, dende'l 1998, ta escribiendo una historia sonora que mos va recordar, cuando yá teamos asomaos a la caxa, qué yeremos y qué facíemos.
Espero que la delegación americana marche cola sensación –inducida– de tar nun pueblu respetable –porque se respeta–, agradecíu –porque sepa reconocer la xenerosidá– y sensible –porque sepa alministrar llárimes y rises–.
Y, eso sí, en marchando voi buscar a esos gaiteros pa recordar too eso que quixere que los de Niu York llevaren con ellos.
(¡Norabona!)
Comentarios fechos (3)
Rosina Fecha: 13/12/2011 a les 17:06:34
La Banda de Gaites de Corvera no sólo suena bien si no que se implica, es solidaria. De Corvera, y Dolfo es buena parte culpable, ha salido alguna de las mejores propuestas creativas asturianas en todos los ´´ordenes. Enhorabuena a los dos
ariana Fecha: 13/12/2011 a les 12:20:47
Toi d´acuerdu con La banda de corvera ye de lo meyor que hai. Vilos esti añu en l´Arribada y prestáronme muncho. Merecen eso y más: lleven en positivo el nome de Corvera y d´Asturies y cola que ta cayendo eso ye impagable
Berto Fecha: 13/12/2011 a les 10:43:15
