Foru (con perdón) del teatru asturianu (2)
05/12/2011 a les 09:52:37 - Archivao en: dolfoAficionaos
Dicíemos qu'aparentemente tiróse a la contra del teatru aficionáu… Dellos presentes volvieron desarrollar un argumentariu victimista onde, inconscientemente, criticando les estratexes y posicionamientos d'aquellos evidenciaben les males estratexes los llimitaos posicionamientos propios. Al endefectu, y más nos últimos años poles polítiques de pura cosmética teatral de los responsables del Principáu –onde la sofística cultural llegó al paroxismu–, FETEAS foi colocando productu con una cierta facilidá demientres que pa los profesionales les coses paecíen complicase… Pero, repito, si hai un responsable oxetivu d'esa situación nun son los representantes de FETEAS o de les compañíes profesionales: son –y póngome coloráu de tener que repetir una obviedá como esta– los responsables políticos que marquen coles sos decisiones/indecisiones, ocurrencies, el mercáu de lo teatral n'Asturies. ¿Tien la culpa FETEAS de que nun esista un circuitu especializáu pa los aficionaos? ¿Tien la culpa ACPTA o Foroescena de que síamos la comunidá que menos apoya económicamente al sector teatral de tol Estáu?
Por eso enfatizo lo de l'apariencia d'eses crítiques. Munchos de los presentes, a esa crítica aceda xuníen el reconocimientu al llabor (como cantera, como atractores de públicos) de les compañíes amateur, otros defendíenla dafechu y toos compartíen que los más de los problemes son comunes y que de manera común había aniciase un nuevu periodu reivindicativu que propiciare una nueva época pa lo teatral n'Asturies.
El circuitu
Tocómos tar na mesa dedicada a analizar el Circuitu Asturianu de Teatru en xunto con Manuel del Rivero, responsable técnicu cultural del conceyu Colunga, y Luís Vigil, de Teatru Kamante. Tolos presentes reclamemos un ameyoramientu del actual Circuitu, yá axustáu nel 2009, pero con dellos puntos (comisiones de selección, númberu de representaciones, mínimos económicos pela parte los ayuntamientos, etc.) susceptibles de ser correxíos col aquel de dexar afitáu un Circuitu que dea de meyor manera rempuesta a les necesidades del sector.
Na discusión (ye consustancial a les terapies de grupu de los teatreros desque participo nelles) acabemos falando de los aniellos de Saturnu. La dispersión ye parte fundamental de discursos bayurosos, por momentos arrellumantes, siempre caóticos, que nun quita pa que, circunstancialmente, puean contener puñetazos de verdá y razón pa que nin los técnicos de lo cultural nin muncho menos los políticos los dexemos de llau.
Y asina compartimos pela enésima vez qu'hai qu'aumentar dotación, que'l Teatru asturianu nun tuvo vaques gordes enxamás, qu'agora destínase pa la producción d'espectáculos lo mesmo qu'hai diez años –depués de pasar per temporaes que se dedicaba muncho menos–; que siguimos siendo la comunidá que menos apoya a los sos creadores; que nunca nun hebo plan de lo teatral nin pa lo teatral n'Asturies; que ye mui complicao d'entender cómo tolos gobiernos que tienen pasao dende l'advenimientu la Democracia dieron la espalda a un sector económicu, creativu, industrial, artesanu y artísticu como ésti…
Que nun hai cifres. Que naide nun sabe (nin quier saber) de qué manera una estrena nel Xovellanos beneficia a los hosteleros de la zona. Que con gula garramos tola burricie pa ignorar en cuánto se valora l'ésitu d'una compañía asturiana afuera y adientro (n'imaxe, n'afitamientu de la marca Asturies no creativo).
Sí, resulta complicao.
Futuru
La última de les meses ye la que más se paecía a lo qu'hai: nella taben representaos los actores, los cineastes, les empreses de casting, los medios de comunicación públicos, les compañíes de dancia, los programadores… Faltaron otra vez los políticos pero yá espliquemos que posiblemente l'usu d'un espaciu tan (vilmente, virulentamente) marcáu como'l Niemeyer desplicó –que nun xustificó– eses ausencies.
De la mesa, axuntando necesidades, deseos, crisis adientro les crisis, destacó una vuelta más tolo que xune a tolos que tienen dalgo que ver col teatru, colos sos oficios… que colo que nos puea separar. Preba del algodón (una más, y van millones) de que hai qu'axuntar voluntaes pa reclamar atención y un tratu xustu.
Nesa mesa intervengo –con tol dolor– pa criticar una vez más (yá lo fici adientro'l conseyu y públicamente) la pérdida d'oportunidá que tuviemos los teatreros de nun tener unos medios públicos (la RTPA, ellí presente) que cumplieren como públicu serviciu col sector teatral. Nin programes especializaos d'información teatral, nin ficción que diere xuegu a los actores asturianos, nin espectáculos teatrales nos medios (teatro radiáu y/o televisáu…) talo cualo faen y ficieron otres televisiones. Lo más paecío a too ello foi'l recordáu El chigre. Pedro Durán y Alberto Rodríguez taben ellí… y tamién unes audiencies que siempre tuvieron perriba les medies de la cadena a un coste mínimu… (datos oxetivos que s'oponen al mantra de los programadores del Ente de que'l teatru en Televisión ye caro y nun tien audiencia. Dalgo absolutamente absurdo cuando se fai dende'l prexuiciu al nun da-y al teatru la posibilidá d'enseñase nesos medios).
En definitiva, unos medios que, nesi sentíu, lo mesmo que sí supieron cumplir pa con otres manifestaciones fondes de la cultura asturiana (la tonada, los deportes tradicionales…) nun fueron quien pa facelo col teatru… Y, polo tanto, asignatura pendiente y necesariu xacimientu d'empléu pa los teatreros asturianos, una vez que se reorganicen los medios públicos asturianos (eso, si hai políticos de verdá discutiéndolo y non cantamañanes enllenos de ruíu y furia).
Conclusiones
L'atopada de Foroescena resultó esitosa y necesaria… Nun quita ello pa que se vaiga pensando n'alcuentru totalizador, a nun entardar, y onde tean presentes toles pates del sector, sobre manera los responsables políticos.
Tando nestes, nun voi recoyer tanto les conclusiones del alcuentru como les mios mesmes conclusiones y propuestes, a manera de los diez mandamientos (vengo de l'Alministración, perdón), les más afitaes al correr d'unos cuantos años yá d'esperiencia como teatreru y xestor.
1.- Doblar los presupuestos destinaos a la producción teatral n'Asturies. La crisis de los mercaos, los agobios financieros del país nun xustifiquen les cantidaes de miseria preexistentes nin, baxo nengún conceptu, podrá actuase a la baxa con unes cantidaes cutres y miserables. Doblando los actuales presupuestos (xubir, por exemplo, a 200.000 euros la partida destinada a les ayudes a producción de los profesionales y a 100.000 euros les de los aficionaos, cifres ridícules –coincidentes colos sueldos de determinaos altos cargos– que daríen cuartel p'afitar el sector, anovar espectáculos de mayor aliendu que daríen más riqueza –más calidá, más trabayu, más espectadores, más recaudación– al sector… Poro, a partir d'una inversión previa, mayor xeneración de riqueza.
2.- Crear un Institutu o Axencia específica dedicada a un sector que ye muncho más que los actores. Recrea podría/tendría que cumplir pa con esi papel… Pero pa eso habría qu'axustar Recrea orgánica y funcionalmente, en munchos sentíos. Si esta necesaria medida se fai al través de Recrea nun tendría costu. Si se fai axuntando a les tres persones qu'agora yá tan faciendo llabor na Conseyería de Cultura de manera esllavazada y voluntariosa sobre'l tema, tampoco. Más nada ye racionalizar les dinámiques alministratives preexistentes… Per ende, fixación d'un Centru de Documentación Teatral –con tolo qu'implica–.
3.- Elevar el nivel alministrativu de la ESAD. Esa elevación aumentaría matriculaciones, inevitablemente, que compensaríen sobradamente los gastos de los profesionales y/o nueves asignatures a poner en marcha. Si nun queremos siguir mandando creadores asturianos pa la diáspora creativa ye acción inevitable. Munchos de los posibles enseñantes yá tán no que yá hai en Xixón.
4.- Facer un plan d'Acción Teatral Integral p'Asturies qu'incluya'l mapa de les infraestructures anguaño esistentes (teatrales y susceptibles de: d'auditorios a cines, de sales d'arte a naves industriales) y ponderación técnica de les que se podríen desarrollar. Trátase d'una ferramienta de trabayu básica que tendría dir más p'allá de los informinos condicionaos y llimitaes de los programadores. Plan d'Okupación Teatral. Rellación d'espacios (sobre manera vieyes escueles) okupables por compañíes residentes y fixación de redes out teatrales coordinaes ente les mesmes empreses.
5.- Ampliación del Circuitu de Teatru Profesional, no tocante a los ayuntamientos participantes, y axuste de los tramos (poblacionales/presupuestarios) qu'entren nél. Creación improrrogable d'un Circuitu pal Teatru Aficionáu y unu específicu en función de les sales y con unos fixos por espectáculu qu'entre (a la manera del gallegu; p. ex).
6.- Entrada del Circuitu Asturianu de Teatru na Rede de Teatros del Estáu y participación activa nos festivales que se faen nel Estáu, n'Europa y en Llatinoamérica en claves de promoción esterna, actualizaes y normalizaes.
7.- Refuerzu publicitariu y promocional a tol sector; tanto a profesionales como a amateur, nos medios de comunicación del país asturianu y, circunstancialmente, del restu del Estáu.
8.- Programes de serviciu públicu específicu onde pase l'actualidá teatral nos medios de comunicación públicos. Ficción y teatru na so parrilla.
9.- Ellaboración d'una sistemática de creitos llandios (que non subvenciones) a producción que sedríen devolvibles en función del númberu de representaciones y ingresos.
10.- Plan d'Acción sobre'l Teatru de la Llaboral. Ye l'espaciu onde se tendría qu'enseñar la produción asturiana nunes condiciones de diginidá y difusión normalizaes. Hasta'l momentu nun se fizo más que dar vueltes, amoriando a teatreros y espectadores, y disparando con pólvora del rei, insultando al respetable y obligándolu a dir, ensin transición nin desplicación razonable, de Mateo Feijoo a José Luis Moreno.
Estos diez mandamientos ciérrense en dos: ama al teatru sobre toles artes y a les demás artes como al mesmu teatru.
Comentarios fechos (5)
Anade Fecha: 09/12/2011 a les 20:25:39
Lo de las salas me parece buena idea. Yo he trabajado en Galicia y te dan un fijo de 750 €, para salas en pequeño formato, no importa que se sea profesional o amateur, sólo las salas condicionan el formato. Muy buenos artículos
Baristu Fecha: 06/12/2011 a les 22:05:09
Peme bien lo que planteyes. Toi nun grupu teatru aficionáu (lo d´amateur, rínchame) y toi un poco hasta arriba de Feteas y el so desaxeráu control de tolo que se mueva n´esi ámbetu. Aprovecharía a fixar tableros de xueu y llimitaciones.
elenia Fecha: 05/12/2011 a les 20:57:03
Estoy con Susana, y añado... ¿Habrá teatreros que lo lean y lo reflexionen? Hace unos años Toño Caamaño sacó un documento muy interesante que muchos del teatro se lo pasaron por donde querían sólo porque iba en bable. Yo me atrevería remandarles estos textos a los de la Consejería de cultura, a ver si deprenden daqué.
susana Fecha: 05/12/2011 a les 19:24:03
Les soluciones qu´aportes paécenme básiques, Dolfu. Añedería la escuela doblaxe como elementu venceyáu a tolo que fales ¿Habrá xente del Principáu que llea esto?
Niembru Fecha: 05/12/2011 a les 12:33:08
Fízose de rogar pero merecvió la pena. Total acuerdu.
