Armando, Casado, Cristina y Filadi
19/12/2011 a les 10:32:55 - Archivao en: dolfoDos nomes propios, un apellíu, una manera secreta de llamase… Los protagonistes de Les Puertes de Tanhauser son agora ellos… elles.
1.- Armando Felgueroso ye un portentosu actor, el secundariu robaescenes del meyor cine o teatru de cuando se facía bon cine o teatru, un artista cola escena a la vena… Escena que tien la necesidá de compartir, porque de los güeyos, de les oreyes, de les manes sálen-y tables, telones, focos… Y porque si nun lo comparte, revienta.
Armando Felgueroso ye de los artistes insustituibles, impagables, de la Compañía Asturiana de Comedias. Entra nel territoriu de los característicos necesarios en cualesquier formación. Podría protagonizar ensin problemes, talentu sóbra-y, y más agora cuando yá los corsés de lo que tenía que facer un galán adversus un secundariu yá tán más que superaos, pero'l tipu de teatru que sigue faciendo na mítica compañía obliga a qu'él tea ehí, nesa segunda fila gociosa que los espectadores avezaos persiguimos como llambedores, pa qu'esi teatru sía posible, siga esistiendo.
Pero non solo ello… Armando Felgueroso tien creao un monologuista, cásique nada, Min de les Pieces, quintasencia d'unu de los arquetipos dominantes nel discursu del monólogu popular asturianu: el del aldeanu buenón, campechanón pero, al tiempu, picardiosu y foín. Y Min de les Pieces axunta, con Pin de la Cotolla o Cellero, nun podium referencial de lo meyor que tien dao esa manifestación nel país. Min de les Pieces diz a la manera clásica, arrastrando y farfollando cuando fala pero dende la claridá; esparabaniando lo xusto, desfaciendo la llingua, deconstruyendo al antihéroe que los monologuistes como naide representen. Min de les Pieces recupera clásicos d'Anxelu, Delestal o Fabricio, recrea nuevos asuntos en reconocible autoría… y fixa discursu sobre'l so oxetu de trabayu, llabor que munchos nun faen. Armando Felgueroso sabe d'ónde vien, investiga… Y con tol voluntarismu del mundu (vivimos nun territoriu estúpidamente hostil pa los teatreros) ye quien a treslladar el so saber y la so esperiencia a esi espectador que lo quiera compartir. Tuvo esti día na ESAD, falando colos alumnos, llevando una conferencia espectáculu que me tocó conocer cuando tovía taba pa parise y Eladio de Pablo (el gran Eladio de Pablo) confírmame lo que yá sabía: que ye un espectáculu que tendría que dir aula per aula de la ESAD a la postrera escuelina d'esti país. Agora la pelota tendría tar nesos responsables educativos (del Principáu, de los Ayuntamientos…) que son tan daos a coleccionar artistes ensin ser quien (por nun saber ¿?) a utilizalos. Ver veremos.
2.- Casado. José Manuel Casado ye l'alma mater y pater (en xunto con Domingo, Ana Rosa…) de la Banda de Gaites de Corvera, una de les formaciones musicales de referencia del país. Casado tará faciendo les fotocopies, confeccionando'l programa, colocando'l productu, reñendo al músicu folgazán o animando a un conxuntu, con una edá media que nun pasará de los 20 años y onde s'axunten unos cuantos virtuosos que tienen fecho de la música'l so koiné pa entendese. Casado ye pura acción y pura emoción. Dirixe la banda dende hai años Francisco Revert y esa ye garantía de calidá na execución y d'atracción nunos programes radicalmente sorprendentes, onde puen tar Paquito el Chocolatero, Morricone o Amy Winehouse…
Casado acaba dexame copia en formatu cedé d'unu de los proyectos musicales más importantes que se tienen fecho n'Asturies nos últimos años y, que por eso mesmo, namás que lu conocen los que participaron nél y la xente que tuvo'l privilexu de sentilo y disfrutalo… yá va pal añu.
El 12 d'avientu del 2010 presentóse La música que lleves adientro, un recorríu sonoru pel rock/pop/folk mundial de los 70 hasta los nuestros díes, con motivu del 25 aniversariu de la Banda corverana. La música que lleves adientro axuntaba nun mesmu escenariu a los 70 músicos de la Banda, más la Banda de Gaites de los Tejedor, más les voces d'Anabel Santiago, Xune, Xulio Antidio… pa interpretar temes –cantaos y/o musicaos– de Queen, Hevia, Ilegales, U2, Tino Casal, Dixebra… Una memoria musical, sentimental, onde entraben en pie d'igualdá estándar d'Amy Winehouse, Michael Oldfield o Ramón Prada. Ensin prexuicios, llevando un mandatu popular que cuasi 2000 encuestaos propunxeren y qu'un xuráu seleccionador (Rafa Balbuena, David Serna, Alberto Toyos, Ariel…) escoyere. Con versiones preparaes a costafecha por Daniel Martín o Ramón Prada y con versionadores al asturianu –y namás qu'al asturianu– como Mario Fueyo o esti firmante…
Y too ello resolvióse nesi únicu conciertu, nesi esclusivu conciertu onde naide nun asistió de los responsables culturales del Principáu (sí el daquella director xeneral de Turismu), de l'Academia, de los ayuntamientos colindantes…
Sí, ciudadanos. Ciudadanos que petaron l'espaciu.
Nun hubo nin Llaboral nin Niemeyer, nin Auditoriu d'Uviéu que lo acoyere (¿pa qué?).
Agora sal el cedé con aquel conciertu memorable… (parte del llabor imparable, infatigable, impagable de Casado y de los que, con él, tiren per esa esperiencia musical, vital, que ye la Banda de Música de Corvera) y vuelvo sentir la rabia, la decepción y, al tiempu, les ganes de desixir (a diestra y a siniestra) qu'esti espectáculu se vea, qu'esa indudable suma de talentu se comparta, recuerra'l país, devuelva pal común l'arte axuntao. Ver veremos.
Y 3.- Cristina Muñiz y Filadi Curto firmen xuntes una novela en castellanu bien prestosa y absolutamente recomendable: Atrapadas en el silencio. Salió'l pasáu mes de setiembre y pue consiguise –amás d'online– n'El Cafetón d'Avilés y na llibrería d'Hipercor. Cristina y Filadi son dos portentoses narradores que tuvi la suerte tener nun taller lliterariu que facíemos en Corvera a primeros de la pasada década. De Cristina Muñiz a estes altures yá poco se pue dicir: ye una trabayadora imparable y esitosa que tien tocao palos creativos tan destremaos como'l cuentu, la novela, el teatru o'l nuevu monólogu (absolutamente recomendables los que tien antologao en Que te preste (Trabe, 2011), que recueyen los estrenaos al través del espaciu La risión de RTPA). De Filadi Curto sí hai qu'apuntar dellos detalles. La vida tiense portao mui cabrón con ella nos últimos tiempos y esta manera fuerte, determinada, esllumante de sacar la cabeza peme de reconocimientu polo que tien d'exemplar y d'enseñar la so intensísima personalidá. Nel cursu lliterariu onde participaba, y onde se conocieren les dos firmantes d'esta obra, Filadi (o Feli, como daquella la reconocíemos), enseñaba yá traces de ser una excelente contadora d'histories: apasionada, intuitiva, rápida. La so lliteratura, como ella mesma, diba al corazón del asuntu, nun se perdía en subordinaciones. Al correr de los años foi publicando pequeños avances d'una posible ofrenda lliteraria qu'agora, con esta escelente Atrapadas en el silencio, una bona suma d'acción, emoción, sexu y (re)sentimientos de la manu de tres muyeres…, empieza felizmente a encarnase.
Avancen que, posiblemente (y si Cristina ye quien a picar a Filadi) haya una nueva muestra d'esi facer. Yo yá naguo por ello y por que los llectores s'arrimen a esa primera y yá feliz muestra lliteraria fecha al marxe de los conductos d'edición convencional, valor añedíu a tener mui a la cuenta.
Comentarios fechos (9)
Romeo Fecha: 19/12/2011 a les 17:18:14
La Banda de Música de Corvera ye mui buena. Vila l´añu pasáu n´Avilés y fue de lo meyor. Estos politicuchos nun cuiden -nin saben- lo que tienen y asina nos va. Toi d´acuerdu con Dolfu
Moriana Fecha: 19/12/2011 a les 16:07:31
Gracies por esti tipu d´artículos que mos alexen, anque sea por un ratadín, del malrollu que domina en tolos ámbetos. De la xente que fais reconocimientu quiero apauitame a Armando, Min de les Pieces, un actor sensacional que merez, como pocos, eses palabres
larodriga Fecha: 19/12/2011 a les 11:26:18
Estos artículos enseñan especial generosidad y rigor. Enhorabuena Dolfu. Soy seguidor de la Banda de Corvera desde casi sus inicios y, como tú dirías, prestan y son de lo mejor que tenemos en asturias. Ojalá tuvieramos en avilés algo parecido.Enhorabuena a Francisco Revert por su magnfiica dirección
Nial Fecha: 19/12/2011 a les 11:09:37
Qué guapo. Tuve en el Conciertu de la Banda de Música cola familia y paeciome de lo más guapo que nunca sentí. La Banda de Música de Corvera ye una pasada. Norabona pol artículu y norabona a la Banda (y a los otros homenajeaos)
